Пакистанскиот премиер Имран Кан оцени дека давање поддршка за Авганистан е верска должност и додаде дека Организацијата за исламска соработка (ОИЦ) има голема одговорност во овој поглед, јавува Анадолија.

Кан им се обрати на учесниците на отворањето на 17. вонредна седница на министрите за надворешни работи на Организацијата за исламска соработка (ОИЦ) во Исламабад, главниот град на Пакистан, на која се разговараше за хуманитарната ситуација во Авганистан.

Тој предупреди на влошената состојба во здравствениот и образовниот сектор и хуманитарната криза во Авганистан, додавајќи дека земјата е на работ на хаос.

Тој нагласи дека на Авганистан му е потребна хуманитарна помош, истакнувајќи дека доколку светот не реагира навреме, оваа земја може да стане најголемата катастрофа што човештвото некогаш ја предизвикало.

Додавајќи дека поддршката за Авганистан е верска должност, Кан оцени дека ОИЦ има голема одговорност во тој поглед.

Тој рече дека поддршката за Авганистан не треба да се поврзува со талибанците, истакнувајќи дека е потребна помош за 40 милиони луѓе во Авганистан.

Кан посочи дека формирањето на инклузивна влада од страна на талибанската администрација и почитувањето на човековите и женските права ќе обезбеди испорака на меѓународна помош, но ја повика меѓународната заедница да биде чувствителна на авганистанските културни вредности.

Организацијата за исламска соработка е меѓународна организација која обединува 57 земји во кои исламот е државна, мнозинска или малцинска религија.