Администрацијата на американскиот претседател Џозеф Бајден оваа недела ќе објави дека ниту еден американски владин претставник нема да присуствува на Олимпијадата во Пекинг во 2022 година, согласно дипломатскиот бојкот на Игрите.

Ова го тврдат неколку неименувани извори за Си-Ен-Ен.

Бајден во ноември изјави дека размислува за дипломатски бојкот откако демократските и републиканските пратеници, вклучително и претседателката на Претставничкиот дом Ненси Пелоси, повикаа на бојкот во знак на протест поради наводните прекршувања на човековите права во Кина.

Според Си-Ен-Ен, не се очекува целосен бојкот, што значи дека на американските спортисти сепак ќе им биде дозволено да се натпреваруваат.

Последен пат САД целосно ги бојкотираа Олимписките Игри во 1980 година, кога американски претседател беше Џими Картер.

Си-Ен-Ен наведува дека минатомесечниот виртуелен самит меѓу Бајден и кинескиот претседател Кси Џинпинг не донел никаков значаен напредок, но послужил како поволен повторен почеток за придвижување на односите по наглото влошување за време на последната година од администрацијата на Трамп.