Цената на гасот на денешното отворање на тргувањето на лондонската берза ИЦЕ се одржува на околу 1.200 долари за илјада кубни метри, а на тоа ниво беше и на вчерашното затворање.

Берзанската цена на гасот во Европа на 21 декември за првпат во историјата надмина 2.000 долари за 1.000 кубни метри, во бранот на претстојното студено време и генерално ниските резерви на гас во европските подземни складишта. Сепак, во следните денови цената се коригира, а аналитичарите тоа го објаснуваат со веста дека за една третина се зголемил бројот на танкери кои превезуваат течен природен гас ЛНГ од САД во Европа.

Некои ја споменуваат и зголемената работа на европските ветерни електрани.

Цената на јануарските фјучерси на ТТФ во Холандија е 1.203 долари за 1.000 кубни метри, или 103 евра за мегават-час, врз основа на тековниот курс евро/долар.

Пазарните експерти велат дека цената на фјучерсите е нестабилна поради шпекулативни фактори и не ја одразува реалната цена на физичките резерви во Европа.