Шефовите на сите политички групи во Европскиот парламент се согласија да ја сменат потпретседателката Ева Каили, пред гласање на пленарна седница, откако таа беше уапсена во корупциски скандал поврзан со Катар, изјавија извори за ДПА.

Каили (44) веќе е суспендирана од должноста потпретседател на Европскиот парламент по нејзиното апсење поради обвиненијата за корупција во петокот.

Конечната одлука за смена на Каили од функцијата треба да ја одобри двотретинско мнозинство од пратениците на ЕУ. Гласањето може да се одржи уште денеска.

Каили и уште тројца се уапсени под обвинение за учество во криминална организација, перење пари и корупција, според белгиското обвинителство.

Четворицата осомничени се обвинети дека влијаеле на одлуки на Европскиот парламент во корист на Катар во замена за пари и подароци. Катар ги негира наводите. (МИА)