Индија планира драстично да го промени начинот на регрутирање војници за својата армија.

Шемата за регрутација денеска ја соопштија министерот за одбрана Рајнат Синг и тројца армиски началници, појаснувајќи дека војниците ќе бидат регрутирани за период од по четири години, а четвртина од нив после отслужувањето на воениот рок ќе бидат воведени во активна служба.

Мерката што има за цел подмладување на армискиот персонал како и подобрување на квалитетот на ангажираните трупи, ќе почне наредните три месеци, а ќе се регрутираат млади лица на возраст меѓу 17 и пол и 21 година.

Согласно плановите, оваа година на тој начин ќе бидат регрутирани околу 46 илјади млади војници. Во рамки на четиригодишниот воен ангажман е вклучена и воената обука, а за активниот период во армијата ќе добиваат месечни надоместоци во износ од 30 до 40 илјади рупии.