Претседателот на Европската комисија Жан-Клод Јункер изјави дека договорот за миграцијата постигнат меѓу партиите во германската владејачка коалиција, изгледа дека е во согласност со законодавството на Европска нија.

– Не сум го проучил во детали, но на прв поглед ми изгледа дека е согласност со законодавтсвото на ЕУ, посочи Јункер додавајќи дека треба детално да го проучат службите на ЕК.

Претходно, ЕК информираше дека ќе го анализира договорот што синоќа го постигнаа Христијанско демократската унија (ЦДУ) на германската канцеларка Ангела Меркел и Христијанско социјалната унија (ЦСУ) на министерот за внатрешни работи Хорст Зехофер, кој предвидува отворање на центри за мигранти на територијата на Германија.

Неименувани извори во Европската комисија соопштија дека правилата на ЕУ за баратели на азил дозволуваат создавање на транзитни зони во државите членки на ЕУ во кои би се обработувале барањата за азил.

Според договорот меѓу Меркел и Зехофер, со кој канцеларката се обидуваше да ја зачува својата коалиција, предвидени се центри од затворен тип во кој ќе се разгледуваат барањата за азил, како и враќање на тие што веќе поднеле барање во друга членка на ЕУ.

Договорот бил доставен до правната служба на Европската комисија, каде ќе биде анализиран, а тој допрва треба да биде одобрен и од третиот коалициски партнер во германската Влада, Социјалдемократската партија на Германија (СПД).

Како што јави ДПА, договорот предвидува мигрантските центри што ќе бидат отворени во Германија, да гаранатираат дека мигрантите нема да имаат речиси никаков контакт со надворешниот свет,

Во центрите во кои ќе се обработуваат барањата за азил нема да биде предвидено ниту изучување на германскиот јазик. Со овие центри се напушта праксата барателите на азил да бидат распоредувани низ германските градови и села, каде го учеа германскиот јазик и имаа можност за интеграција.

Според барањата на министерот Зехофер, овие центри ќе бидат строго наменети за обработка на барањата за азил и нема да ги подготвуваат мигрантите за подолготраен престој во Германија.

Зехофер се закануваше со оставка и со раскинување на долгогодишната коалиција меѓу неговата баварска ЦСУ и ЦДУ, доколку не се стори нешто во врска со напливот на мигранти.

Засега само Баварија реши да отвори ваков центар, додека другите германски покраини се немаат изјаснето.

Медиумите оценуваат дека во баварскиот пилот-центар мигрантите живеат во пренатрупани објекти и честопати протестираат поради условите за живот.

МИА