Агенцијата на ЕУ за спроведување на законот, Европол не го исполни својот потенцијал за отстранување мрежи за шверцување мигранти, бидејќи ги нема сите потребни информации, заклучија денеска официјалните ревизори.

– Како центар за размена на информации, Европол треба да има пристап и систематски да ги користи сите релевантни извори на податоци, но тоа во моментов не е така, рече членката на Европскиот суд на ревизори (ЕЦА), Бетина Јакобсен, во писмена изјава.

Европол, со седиште во Хаг со персонал од повеќе од 1.000 луѓе, им помага на 27 земји-членки на ЕУ да се координираат едни со други додека се обидуваат да ги растурат мрежите што им помагаат на луѓето да мигрираат во Унијата.

Но, оваа работа честопати е фрустрирана од парцијален пристап и употреба на клучните бази на податоци – и приватни и јавни – и понекогаш со ограничен ангажман од самите земји-членки, откриле ревизорите.

На пример, телото „не прави систематска употреба или воопшто не користи надворешни извори на податоци, како што се Информативниот систем за визи и евиденцијата за името на патникот“, се вели во соопштението на ЕЦА.

Агенцијата, која исто така работи со земји и организации кои не се членки на ЕУ, се соочува со проблеми при постигнување договори за размена на информации со држави на потекло или транзит надвор од Европската унија, тврди ЕЦА.

На околу 90 проценти од илегалните мигранти кои пристигнаа во ЕУ им помогнале шверцери, покажува истражувањето на Европол.

Агенцијата проценува дека индустријата – која вклучува услуги како сместување, транспорт и обезбедување лажни документи – е многу профитабилна. На пример, во 2015 година се сметаше дека има обрт од три до шест милијарди евра (3,5 до 7 милијарди долари).