САД веруваат дека Русија ја потцени силата на отпорот на Украина пред да ја почне инвазијата, која веројатно ќе предизвика илјадници руски жртви, соопшти денеска американската разузнавачка служба.

Директорката на Националната разузнавачка служба, Аврил Хејнс, изјави дека американските власти веруваат дека рускиот претседател Владимир Путин се чувствува повреден поради неуспехот на Русија да ја освои Украина и верува дека тој не може да си дозволи да ја загуби војната.

Таа изјави дека тоа што Путин може да го смета за победа може да се промени, со оглед на ескалацијата на трошоците за конфликтот за Русија.

И покрај најавата на Путин дека ќе го покрене нивото на подготвеноста на Русија за нуклеарно оружје, САД не забележуваат невообичаени промени во односот на руската нуклеарна сила. Во оваа фаза не е јасно дали Русија ќе се обиде да ја освои цела Украина, за што би биле потребни повеќе ресурси отколку што Путин за тоа определи. (МИА)