Поради проблеми со пренаселеност, загадување и последици од климатските промени, како што е растење на нивото на морето, се повеќе земји размислуваат за можност за преселување на главните градови.

После Индонезија, Тајланд би можела да биде следната држава во југоисточна Азија која ќе го пресели главниот град, откако премиерот Прајут Цан-Оца оцени дека таквиот чекор би му помогнал на Бангкок да ги надмине се поголемите урбани предизвици.

Исто како и Џакарта, Бангкок се соочува со пренаселеност, загадување, пораст на нивото на морето и густ сообраќај, пишува „Гардијан“.

Градот има две опции – да најде друг град кој не е ниту предалеку ниту прескап за преселување, а другата можност би било раселување во поширокото подрачје на Бангкок за да се намали гужвата.

Премиерот истакна дека таков чекор би подразбирал сеопфатно истражување на социјалните и економските последици.

Предлогот следуваше неколку недели откако претседателот на Индонезија Џоко Видодо најави преселување на административното седиште на земјата од пренаселената Џакарта во Источен Калимантан, на индонезискиот дел на островот Борнео.

Ситуацијата во Џакарта, која е изградена на трусно подрачје во мочуриште во близина на 13 реки, дополнително е влошена со стихиски развој, лошо урбано планирање и сообраќајни гужви.

Дополнителен проблем е и тоа што Џакарта нема водоводен систем во северниот дел, па поради тоа искористувањето на подземните води доведе до слегнување на тлото и Џакарта во некои делови тоне и до 25 сантиметри годишно.

Иако главниот град ќе биде изграден на друго место, властите смислуваат мерки како да го спасат градот, а некои од предлозите се вештачки острови околу Џакарта и изградба на брани околу најзагрозените подрачја.

На списокот на градови кои тонат, покрај Џакарта, се и градови како Венеција, Шангај, Њу Орлеанс и Бангкок, но Џакарта досега направила многу малку за да ја реши ситуацијата.

Инаку, и до сега се менувале главни градови.

Во 2005 година Нејпидо стана нов главен град на Мјанмар, наместо Јангон.

И Канбера е изградена за да биде главен град на Австралија во 1911 година наместо Мелбурн.

Бразилија исто така е изградена со цел Бразил да го премести главниот град од Рио де Женеро во 1960 година.