Американскиот претседател Џо Бајден изјави дека водачот на Ал Каеда Ајман ал Завахри, еден од најбараните терористи во светот, бил убиен во напад на американско беспилотно летало во Кабул за време на викендот.
„Сега правдата е задоволена и овој терористички лидер го нема“, рече Бајден во телевизиското обраќање на 1 август.
Белата куќа претходно објави дека Соединетите држави спроведоа успешна антитерористичка операција против „значајна“ цел на Ал Каеда во Авганистан во текот на викендот.
Бајден рече и дека американските разузнавачки службеници го следеле Ал Завахри во дом во центарот на Кабул каде што се криел со своето семејство. Претседателот ја одобри операцијата минатата недела и таа беше спроведена на 31 јули.
