Поради силната бура пропратена со силен ветер околу 13.000 туристи се „заробени“ во швајцарскиот ски-центар Зермат, а тие кои сакаат да го напуштат обезбедени се хеликоптери.
Локалните власти во исто време предупредуваат на опасност од „многу големи лавини“.
Полицијата вчера ги затвори патиштата кои водат кон областа, а исто така ги откажа и возовите. Скијањето и планинарењето е забрането поради опасност од лавини. Исто така е „блокиран“ и пристапот до ски-патеките.
Во областите над 1.500 метри надморска височина во Швајцарија во изминатиот период падна над еден метар снег, а Зермат е отсечен од вчера. Зимскиот центар, што се наоѓа во подножјето на врвот Матерхорн, и располага со над 13.000 легла.
Зермат се наоѓа на околу 120 километри источно од Женева. (МИА)
