Боксерските прваци Ентони Џошуа и Тајсон Фјури потпишаа договор за обединување на титулите на ВБА, ИБФ, ВБО и ВБЦ. Џошуа е сопственик на титулите на ВБА, ИБФ и ВБО, додека Кралот на Ромите го носи шампионскиот појас на ВБЦ. По повеќемесечни преговори се договорени две борби.

„Сè е потпишано. Наскоро ќе се знае кога и каде ќе се случи првата борба“, изјави агентот на Џошуа и главниот организатор на настанот, Еди Херн и додаде:

„Следниот месец сакаме да имаме сè решено. Најтешкиот дел е секогаш кога сите треба да го потпишат договорот. Вложивме многу напор во овие преговори“.

Неодамна Херн изјави дека сите од страна на Џошуа потпишале договор, а Фјури и неговиот тим сè уште чекаат. Очигледно на другата страна и требаа неколку дена добро да го прочешлаат договорот пред да ги стават потписите.

Конечно го направија тоа и организацијата на големиот боксерски спектакл доби зелено светло.

„Го направивме најтешкиот дел. Изминатите неколку месеци беа многу стресни“, призна Еди Херн и продолжи:

„Имаме осум или девет понуди од оние кои сакаат да организираат голем боксерски настан. Тоа е еден од најголемите боксерски мечеви, па дури и еден од најголемите спортски настани во светот. Оној што ќе го организира мечот ќе оствари една голема победа“.

Боксерскиот спектакл треба да се одржи во јуни, а Саудиска Арабија во моментов е најспомнуваниот домаќин на првиот настан. Очигледно дека шеиците се подготвени многу да инвестираат.