Полицијата во Лос Анџелес се обиде да активира неколку тони нелегален огномет, по што следеше силна експлозија во која се повредени повеќе од 17 лица, вклучително и полицајци.

Девет полицајци и еден федерален агент од Бирото за алкохол, тутун, огнено оружје и експлозиви се повредени во несреќата. Шест цивили се пренесени в болница – тројца со сериозни и тројца со полесни повреди.

Според „ЛА Тајмс“, единицата за борба против експлозии на полицијата во Лос Анџелес се обидела на безбеден начин да ги детонира запленетите импровизирани експлозивни направи и неколку тони нелегален огномет, но обидот бил неуспешен.

Експлозијата одекна во резиденцијален кварт, при што биле оштетени куќи и автомобили, а камионот во кој се наоѓал нелегалниот огномет е сериозно оштетен.

Началникот на полицијата во Лос Анџелес, Мишел Мур, на прес-конференција истакна дека полицајците пронашле неколку тони нелегален огномет и импровизирани експлозивни направи во една куќа, кои тој ги опиша како „нестабилни“.

Единицата за борба против експлозии потоа го премести целиот запленет експлозив и огномет во железна комора во специјално возило наменето токму за транспорт на ваков материјал.

Полицијата го активираше нелегалниот огномет верувајќи дека комората и возилото ќе можат да ја спречат експлозијата, но „се случи катастрофален неуспех“.

– Сè беше спроведено според протоколи за вакви ситуации, но очигледно се случи нешто во возилото што не требаше да се случи. Не знаеме зошто, но ќе дознаеме, објасни Мур.