Преостанаа уште три натпревари од 16. Европско фудбалско првенство. Денес и утре на програмата се полуфиналните средби на „Вембли“, каде ќе се сретнат Данска со Англија и Шпанија со Италија.
Тоа значи дека бројни фудбалски ѕвезди остануваат во борбата за престижниот трофеј, а интересно е тоа што само еден европски гигант има по најмалку еден претставник во најдобрите четири селекции на континенталниот собир.
Освојувачот на Лигата на шампионите, Челзи, во своите редови ќе има и фудбалер со златен медал и од Европското првенство. Цезар Аспиликуета е незаменлив на десната бековска позиција на Шпанија, Кристенсен е столбот на одбраната на Данска, Жоржињо и Емерсон ги бранат боите на Италија, додека Мејсон Маунт, Бен Чилвел и Рис Џејмс го носат дресот на Англија.
Полуфиналната фаза ќе ја отворат Шпанија и Италија, додека в среда ќе се сретнат домаќинот Англија со Данска.