Високиот орган за здравство на Франција смета дека третата доза вакцина против Ковид-19 во моментов не е потребно да им се наметне на сите граѓани, јави дописникот на МИА од Париз.

– Во моментов нема потреба да се понуди третата доза на вакцина против Ковид-19 на целата популација, „освен на најранливата и најстарата“, поради недостиг на „достапни податоци“, соопшти Високиот орган за здравство.

Во соопштението се наведува дека „третата инјекција, иако се чини многу веројатно дека ќе обезбеди ефект на зајакнување, досега достапните податоци не дозволуваат прецизна проценка на влијанието или потребата за таков засилувач“.

Високиот орган за здравство „затоа смета дека нема аргумент да се препорача засилувачка доза, освен за луѓето кои веќе се цел на владините одлуки, без оглед на првичните вакцини“.

– Приоритет за следните неколку недели е да се направи се што е можно за да се зголеми опфатот на вакцинација, особено кај луѓето над 80-годишна возраст за кои вакциналното покритие е сè уште недоволно (75 отсто) и покрај нивната голема ранливост на болести“, додаде Високиот орган за здравство.

Претседателот на Франција Емануел Макрон се потпре на мислењето на Научниот совет, објавено на 9 јули, во кое се препорачува „сега да се предвиди засилна вакцинација кај луѓе над 80 години кои живеат во домови за стари лица или дома“. На меѓународно ниво, ниту еден здравствен орган сè уште не се произнел во оваа насока.

Од своја страна, Високиот орган за здравство не ја исклучува „релевантноста“ на таквата акција за целото население, „доколку се докаже намалување на заштитата од Ковид-19 со текот на времето врз основа на „неуспеси на вакцините забележани во реалниот живот (и не само врз основа на пад на нивото на антитела) или ако на територијата се појави нова варијанта повеќе отпорна  на моментално достапните вакцини”.

Но, за да може да го утврди ова, таа ја нагласува потребата да се следат „инфекциите кај целосно вакцинирани лица“ и да се започнат студии за ефикасноста и безбедноста на дополнителна инјекција.

Во второто мислење објавено во петокот, здравствениот орган ја смета за „оправдана“ обврската за вакцина против Ковид-19 „за професионалци во контакт со ранливи лица“, како што беше најавено од претседателот Макрон и како што е предвидено во предлог-законот што ќе биде презентиран пред Советот на министри во понеделник.

Во овој момент, повеќе од половина од француското население примило барем една доза вакцина, а повеќе од четвртина добиле целосна вакцинација.

Објавувањето во понеделникот вечерта за обврската за вакцинација за одредени професии и за продолжувањето на здравствениот пасош на културни настани од среда, а потоа и на многу други места (ресторани, големи трговски центри …) на почетокот на август доведе до поголем број барања термини за вакцина. (МИА)