Студентите и студентките ја започнаа наставата на универзитетите откако талибанците ја презедоа власта во Авганистан. На некои факултети студентите и студентките се одвоени со завеси или табли во средината на предавалните, јавува „Ројтерс“.

За време на владеењето од 1996 до 2001, талибанците им забранувале на девојчињата да одат на училиште, а на девојките и жените да одат на универзитет и на работа. Талибанците сега тврдат дека ќе ги почитуваат правата на жените според исламскиот закон, но не е јасно што ќе значи тоа во практика.

Професори и студенти на универзитетите во најголемите градови во Авганистан изјавиле за „Ројтерс“ дека студентките се одвоени на предавањата, имаат посебни предавања или не може да пристапат до одредени делови од кампусите.

-Навистина се чувствував ужасно кога влегов на предавањето… Се враќаме 20 години во минатото – изјавила студентка за „Ројтерс“.

Таа открива дека студентките седеле одвоено од студентите и порано, но предавалните не биле физички одвоени.

Според документ со правила за одржување на предавањата на факултетите, задолжително е носењето марама за студентките, а универзитетите треба да имаат посебен влез за жените. Треба да се вработат професорки за да им предаваат на студентките во посебни простории или во простории кои се поделени.

Повеќе професори изјавиле дека не е јасно кои правила треба да се почитуваат под власт на талибанците, кои допрва треба да формираат влада.

LOOK: Students at Avicenna University in Kabul, Afghanistan have started attending class for the first time since the Taliban stormed to power, with females separated from their male peers by curtains or boards down the middle of the classroom. |📷Social media handout/via Reuters pic.twitter.com/F1fgaA5FlP

— Inquirer (@inquirerdotnet) September 7, 2021