Само две жени градоначалнички се изгласани на локалните избори 2021 година, наспроти 79 мажи во останатите општини.

Станува збор за Данела Арсовска, независна кандидатка поддржана од ВМРО-ДПМНЕ, која вчера освои скоро 30 илјади гласа повеќе во Град Скопје пред противникот Петре Шилегов и досегашната градоначалничка на Старо Нагоричане од СДСМ, Жаклина Јовановска, која со 14 отсто повеќе гласови од противникот го освои вториот мандат.

Доколку ги претставиме како проценти – само 2,5 отсто од 81 македонска општина добија „мајка“. Градоначалници мажи Македонија има 40 пати повеќе.

Ова е најлоша родова распределба на градоначалничките мандати од локалните избори во 2009 година, кога не беше избрана ниту една жена на оваа функција.

Во 2013 година беа избрани 4 жени градоначалнички, додека во 2017 година избрани беа 6 градоначалнички.

Годинава од вкупно 299 кандидати за градоначалник само 25 беа жени.