Чави Ернандес не го криеше големото разочарување по поразот од Баерн Минхен и огорчено нагласи дека мора да се соочи со суровата реалност, која во овој момент е испаѓање од Лигата на шампионите и продолжување во второто по ранг европско натпреварување.
Барса ќе игра во Лигата на Европа за првпат по 2004-та година, натпреварување за кое Чави нема никакво потценување, но кое смета дека не одговара со традицијата и историјата на каталонскиот великан.
На прес-конференцијата во Минхен, Чави потенцираше дека Барселона го допрела дното и започнува една нова етапа, во која сите ќе мора добро да се потрудат за да го вратат клубот онаму кадешто заслужува.
Реконструкцијата на Барса претставува подолг процес и истиот ќе донесе и неколку болни одлуки од Чави, кој вчера без влакна на јазикот им порачал на одредени фудбалери дека набрзо нема да бидат дел од првиот тим.
– Некои од вас не сфаќаат што значи да се игра за Барселона, – им порачал револтираниот Чави на фудбалерите во соблекувалната, фраза која ја открива угледниот каталонски „Спорт“ кој редовно добива инсајдерски информации од клубот.