Двајца високи функционери на грчката влада денеска поднесоа оставки поради зголемениот притисок врз администрацијата на грчкиот премиер Киријакос Мицотакис поради шпионскиот скандал во кој беше прислушуван телефонот на еден лидер на опозицијата, пренесува порталот Политико.
Генералниот секретар на Владата Григорис Димитријадис, главен соработник и внук на Мицотакис, поднесе оставка, а потоа следеше оставката и на шефот на грчката Национална разузнавачка служба (ЕИП), Панајотис Контолеон, откако беше обвинет за „несоодветни постапки“ од Кабинетот на премиерот.
Двојната оставка уследи по откритијата за обид за хакирање на мобилниот телефон на пратеникот Никос Андролакис со шпионски софтвер наречен „Предатор“.
Андрулакис е лидер на третата по големина партија во грчкиот парламент, Пасок, додека Мицотакис потекнува од десноцентристичката партија Нова демократија, наведува Политико.