Голманот на српската репрезентација Дејан Милосављев ќе биде подготвен за претстојното Светско првенство, покажаа тестовите во Берлин.Голманот на германскиот Фуксе Берлин успешно заздрави и ќе му биде на располагање на селекторот Тони Џерона.

„Лекарскиот тим на машката сениорска репрезентација изминативе дваесет и два дена интензивно работи на закрепнувањето на Милосављев, со што драстично е подобрена неговата состојба во однос на првичната ситуација со повредата. Дејан Милосављев со нетрпение го чека неговото враќање во националниот тим и учеството на Светско првенство“, се вели во соопштението на Рaкометниот сојуз на Србија.

Светското првенство започнува в среда, но Србија својот натпревар од групата Е го игра против Алжир во петок, а потоа следуваат дуелите со Германија (недела, 15 јануари) и Катар (вторник, 17 јануари).