„Исходот од референдумот во Поранешната Југословенска Република Македонија (ПЈРМ) за името на земјата покажа дека поширокиот регион од кој Грција е дел, исто така е зафатен во невообичаено и сигурно антисистемско расположение. Резултатот беше, пред се, пораз за Западот. Соединетите Американски Држави и Европската унија ја повторија фаталната грешка направена во кампањата „да“ за време на референдумот во Грција во 2015 година за програмата за спас на земјата. Странските системски претставници од германската канцеларка Ангела Меркел до американскиот секретар за одбрана, Џим Матис, го посетија Скопје. Соочени со оваа голема, иако конвенционална кампања, противниците на договорот тивко се мобилизираа на социјалните медиуми. Како што често излегува во последниве години, движењето на отпорот успеа да ја победи редовната армија.“ – анализира грчкиот весник Катимерини.
Во текстот се потенцира дека премиерот на ПЈРМ, Зоран Заев, не е особено харизматичен политичар и поддршката за него е прилично шуплива. Катимерини ги анализира и следните чекори на премиерот Заев
„Тој сега ќе се обиде да ги убеди своите сонародници дека „не“ значи „да“ – во голема мера она што неговиот грчки колега Алексис Ципрас го направи во 2015 година. Ќе биде многу тешко за ова да помине во парламентот на ПЈРМ без нови избори. Барањето за уставна ревизија, што го наметна претседателот на државата Ѓорге Иванов (непријател на договорот кој ги повика гласачите да го бојкотираат референдумот), како дел од договорот, се покажа како најважен безбедносен вентил. Ципрас и неговиот министер за надворешни работи Никос Коѕијас, премногу инвестираа во договорот во Преспа, што, најверојатно, беше и чип за ценкање во преговорите со грчките меѓународни кредитори.“
-На површината, евентуален колапс на договорот би бил во интерес на владата предводена од СИРИЗА, бидејќи тогаш ќе биде избегната сценарио на раскол меѓу Ципрас и неговиот помлад националистички коалициски партнер Панос Каменос. Сепак, многу набљудувачи веруваат дека прекин би бил во интерес на двајцата. Секако, постои и прашање за тоа како еден политичар кој е можен кандидат за Нобеловата награда за мир поради Преспанскиот договорот може да ја дели власта со политичар кој верува дека тоа е криминален договор. Но, како што сите знаеме, ова е Балкан, тоа не е смешно прашање, се додава во анализата на Катимерини.
