Претседателот Стево Пендаровски денеска го прими генералниот директор на Меѓународната организација за миграции (ИОМ), Антонио Виторино.

На средбата се разговараше за тековните активности на организацијата во Република Северна Македонија во однос на прашања врзани со миграцијата.

Претседателот Пендаровски се заблагодари за севкупната поддршка што организацијата ја дава на македонските институции во градењето капацитети за менаџирање на миграцијата, заштитата на мигрантите, борбата против трговијата со луѓе, како и поддршката во усогласување на системот за управување со миграцијата со правото на Европската Унија.

Претседателот Пендаровски ја истакна посветеноста на Македонија за развој на одржлива и сеопфатна рамка за управување со легалната и нелегалната надворешна миграција, согласно усвоената национална Резолуција на мигрантската политика 2021-2025 година.