Во денешното издание на “Утрински брифинг” кај Сашо Ордановски, гостуваше премиерот Зоран Заев кој зборуваше за уделите на неговото семејство во многубројните приватни бизниси, како и поврзаноста со моменталните случувања во Еуростандард банка, односно нејзиното затворање.
Инаку, Еуростандард банка долг период имала проблем со наплата на ратите од земените кредити, меѓу кои и 29 струмички фирми, во кои несомнено удел има семејството Заеви.
Зоран Заев вели дека не е тајна што неговото семејство е дел од голем број на бизниси низ Република Македонија, особено во дваесетина кои се точно во Струмица. Покрај бизнисите во кои и самиот тој учествува, не криеше дека неговиот брат Вице Заев е партнер во повеќето струмички приватни бизниси.
“Мојот брат Вице е партнер во една од фирмите кои биле на списокот на оние кои имале кредити во Еуростандард банка. Во таа фирма не е само тој, туку учествува со 20% или 30%, не знам точно. За 35 милиони денари кредит, заложени се 3,5 милиони евра објекти. И тука нема ништо спорно”, вели Заев.
На јавноста и е познато дека семејството Заеви царува низ државата, особено во источниот дел на Република Македонија, каде што поседуваат голем број на фирми и бизниси, а во останатите се како дел од партнерско друштво.
Со оваа денешна изјава Зоран Заев само ги потврдува тезите дека семејството Заеви е можеби најбогатото семејство кое не бира на каков начин ќе стигне до капитал, кој во многу наврати се покажа како нелегален.
