Град Скопје сè уште не одлучил дали италијанскиот конзорциум „ФЦЛ Амбиенте“ ќе остане концесионер на депонијата Дрисла или пак неа ќе ја преземе германски „Шолц“, иако тоа требаше да го направи до крајот на август минатата годината, пишува порталот СДК.
Градот, два месеца по доаѓањето на Петре Шилегов на градоначалничката функција, поднесе жалба до Вишиот Управен суд во која бараше целосно да се поништи постапката за избор на концесионер и депонијата да се врати на Градот за да може да се распише комплетно нов повик за избор на концесионер. Шилегов неколку пати апелираше до судот што побрзо да ја донесе одлуката.
„Ги замолувам Управниот суд да се донесе што е можно побрзо одлука. Не навлегувам каква ќе биде таа. Но да знаеме кој ќе биде партнер на Градот за да можеме заеднички да ја креираме политиката за третирање на отпадот“, рече Шилегов лани во април на пуштањето во употреба на филтерот на печката за медицински отпад.
Вишиот Управен суд одлучи по жалбата лани во јули, со тоа што му наложи на Град Скопје да направи нов избор меѓу двете фирми кои учествуваа на тендерот во рок од еден месец односно до 31 август. Оттогаш се поминати 6 месеци, а Шилегов иако бараше што побрзо да се донесе одлука, сега со месеци ја влече постапката.
„Формирана е комисија која ги разгледување и врши бодување на двете понуди. За кратко време ќе биде донесена одлука“, изјавил Шилегов за СДК, не објаснувајќи зошто е потребно половина година да се донесе одлука кога Судот наложи да се заврши постапката за еден месец.
Шилегов досега неколку пати изјави дека италијанскиот конзорциум изминативе 7 години нешто не вложил во Дрисла. Тие требаше требаше да направат нова постројка за индустриски и за медицински отпад, за селекција на отпадот, да набават нова механизација и опрема, да изградат нов административен објект, како и да произведуваат струја од ѓубрето.
И од неговата партија СДСМ, додека беа опозиција кога италијанскиот конзорциум ја доби под концесија „Дрисла“, постојано на прес-конференции и со соопштенија обвинуваа дека бизнисот со Дрисла е скандал од светски размери, бидејќи и покрај одлуките на Судот во полза на германската фирма се склучува повторно договор со фирма која е формирана два дена пред објавување на тендерот.
Град Скопје во 2011, во мандатот на градоначалникот Коце Трајановски од ВМРО-ДПМНЕ, ја избра италијанската фирма „ФЦЛ Амбиенте“ за концесионер на Дрисла во наредните 35 години. Германски „Шолц“, второпласирана фирма на тендерот, двапати го обжалуваше договорот со италијанската фирма, по што Управниот суд пресуди дека поради неправилности во тендерската постапка треба да се склучи нов договор, но Град Скопје, додека градоначалник беше Трајановски, повторно на двапати склучуваше договор со „ФЦЛ Амбиенте“.
По повторната тужба на Германците во октомври 2017, Управниот суд донесе одлука Град Скопје да го раскине договорот со Италијанците и да склучи нов со Германците. По оваа одлука, на крајот на 2017 пред Нова година градоначалникот Шилегов рече дека ќе поднесе жалба до Вишиот Управен суд, во која бараше да се врати депонијата целосно во сопственост на Градот, па дури потоа да се бара нов концесионер кој ќе биде обврзан да воведе најсовремени технологии за третирање на отпадот и ѓубрето на Дрисла.
