Познати се сите финалисти на овогодинешниот Евросонг, а ситуацијата кај обложувалниците се менува од час во час.

Имено, од првото полуфинале се пласираа Хрватска, Молдавија, Швајцарија, Финска, Чешка, Израел, Португалија, Шведска, Србија и Норвешка. Од втората полуфинална вечер во финалето се пласираа Албанија, Кипар, Естонија, Белгија, Австрија, Литванија, Полска, Австралија, Ерменија и Словенија. Уште шест земји директно се пласирани во финалето, а тоа се Шпанија, Франција, Велика Британија, Германија, Италија и Украина.

Како што се наближува финалето, ситуацијата со обложување на Евровизија постојано се менува. Откако вчера беа објавени последните финалисти и земјите кои не напредуваа беа отстранети од рангирањето, табелата изгледа поинаку.

Како и претходните денови, во првите три се Шведска, Финска и Украина. Ситуацијата после нив често се менува, но сега Франција е на четвртото место, Израел на петтото, а Шпанија на шестото место. Италија се искачи на осмото место, а зад неа е Австрија на деветтото место.

Хрватска од влезот во финалето го држи 13-то место во обложувалниците. Србија падна на 22. место, додека Словенија скокна на 19. Последните места се Португалија, Литванија и Албанија.