Поминаа 15 години откако Тоше Проески загина во сообраќајна несреќа, но неговата ѕвезда сè уште свети со истиот сјај.

Македонскиот пејач имаше само 26 години кога почина, но и тогаш уживаше во статусот на еден од најдобрите музичари во регионот.

За длабокиот белег што го остави Тоше Проески на сцената говори и тоа што ниту еден музички натпревар не поминува без хитовите што ги сними, а многу млади пејачи кои штотуку избиваат на сцената се обидуваат да го копираат неговиот начин на пеење.

По патот на Тоше тргна и неговиот внук Кристијан Ристески, син на неговата сестра Дора, која има 25 години.

Пошироката јавност првпат слушна за Кристијан кога како момче ја пееше песната „Моја малечка“ заедно со неговиот познат вујко, а видеото кое е снимено една година по смртта на Тоше го сочинуваат фотографии од нивниот семеен албум.

‒ Тоше и Кристијан беа многу блиски. Му всадил љубов кон музиката, го научил да свири и да пее. Сепак, тој никогаш не сакал јавно да го разоткрие својот внук. Се сеќавам кога го снимаше спотот за песната „Мој свет“, посветена на „Уницеф“, во кој се појавуваат многу деца, нашата мајка го праша зошто не го покани и Кристијан, а тој одговори: „Кристијан е многу талентиран. Ќе дојде време кога ќе биде претставен на јавноста. Засега сакам да го држам настрана, тешко е да се биде дел од естрадата. Моите синови Кристијан и Никола беа во шок кога тој почина, не можеа да прифатат дека го нема“, изјавила во една прилика неговата сестра.

Кристијан Ристески, за кој се вели дека е вистинскиот наследник на Тоше Проески, живее во Скопје. Студирал на Факултетот за аудиовизуелни уметности, а извесно време престојувал во Лондон на покана на британскиот продуцент Енди Рајт, кој бил и соработник на Тоше.