Раководството на Манчестер Јунајтед ги замрзна сите планови за трансфер, сè додека не се знае дали клубот ќе се натпреварува во групите на Лигата на шампионите во следната кампања.

„Црвените ѓаволи“ влегоа во лоша форма во најнеповолниот момент од кампањата, дозволувајќи две реми против Саутемптон и Вест Хем, како и пораз од Челси за ФА Купот. Овие околности сериозно го доведоа во прашање евентуалното учество на тимот на најпрестижниот европски клупски турнир следната сезона.

Манчестер е на 3-то место, со еднакви бодови со 4-тиот Челси и само еден бод предност од 5-тиот Лестер. Интересно е што Јунајтед им гостува на „лисиците“ во последното коло од Премиер лигата во директен натпревар за место во топ 4.

Оваа неизвесност за финансискиот приход на клубот, го натера раководството да престане со сите разговори за селекцијата во текот на летото, барем до после средбата со Лестер. Неуспехот на „црвените ѓаволи“ да ја исполнат целта ќе значи дека момчињата на Оле Гунар Солскјер ќе треба да се потпрат на освојување на Лига Европа на крајот на тековната кампања за да најдат место во Лигата на шампионите.