Францускиот играч за врска на Манчестер јунајтед, Пол Погба, ќе отсуствува од фудбалските терени неколку недели, откако го повреди десниот бут за време на саботниот натпревар против Евертон (3:3), обелодени вечерва тренерот Оле Гунар Солскјер.
– Тоа е повреда што бара неколку недели рехабилитација. Тој штотуку го започна процесот на закрепнување во координација со медицинскиот тим на клубот и ќе го вратиме на теренот што поскоро и безбедно. Пол ни е многу важен и нема да ризикуваме, изјави Солскјер.
Меѓу натпреварите што Погба ќе ги пропушти поради повредата се пресметките против Вест Хем во англискиот ФА куп, во вторник, и против Реал Сосиедад во рамки на шеснаесетфиналето во Лига Европа, на 18 и 25 овој месец.