И повторно остри коментари на релација Кил – Хрватска. Тренерот на „зебрите“, Алфред Гисласон, имаше интервју за локален медиум во Германија и со многу гнев зборуваше за Хрватска и за Лино Червар.
-Некој изгледа не може да разбере дека Дувњак не беше подготвен да настапи. Не ми е јасно како се уште беше на теренот, кога тие имаа чиста победа против Србија (32-22), вели бесниот Исланѓанец.
Дувњак се повреди на три минуди до крајот на мечот, кога и можеше да биде поштеден со оглед на високото водство на Хрватска. Наредниот ден покажа дека има скинато мускулно влакно на листот на десната нога и дека сигурно ја пропушта првата фаза. За втората, Хрватите уште се надеваат дека може да се врати, што уште повеќе го лути Гисласон, бидејќи тоа ќе значи дополнителен ризик за неговиот најдобар играч, токму пред да продолжи клупската сезона.
-Ако се обидуваат да го вратат повторно да заигра на ЕП, единствените големи губитници од ова Европско првенство ќе бидеме ние, додаде тренерот на Кил.
Дувњак беше отсутен седум месеци поради операција на левото колено, но во декември се врати дури и во дресот на Кил. Тоа ги израдува Хрватите и Лино Червар, но очигледно тоа кратко траеше.
