Селекторот на ракометната репрезентацијата на Црна Гора, Зоран Рогановиќ си поднесе оставка од позицијата по поразот на неговата селекција од Словенија.
Словенците беа убедливи против Црна Гора и славеа со 31:23 со што го обезбедија третото место во групата кое ќе им донесе прилика да се борат за пласман од 9. до 12. место на Мундијалот кое би можело д аим донесе и квалификации за Олимписките игри.
Фактот што Црна Гора не успеа да се пласира на квалификациите за Олимписките игри е причина, Рогановиќ да поднесе оставка од позицијата селектор на оваа балканска репрезентација.
– Горд сум на се што остваривме во изминатиот период. Селектор сум од 2018 година, учествувавме на две Европски првенства, а учествувавме и на ова Светско првенство. Од година во година напредувавме, и верувам дека така ќе биде и во иднина затоа што оваа селекција има огромен потенцијал. Мене зборот ми е поважен од се. Кога бев именуван за селектор дадов збор дека ќе имаме континуитет на големите натпреварувања и дека ќе се бориме за место на Олимписките игри. Споменатата цел не успеавме да ја оствариме на ова натпреварување, па сметам дека е чесно да се повлечам иако имав понуда да останам на селекторската позиција. Време е за нови луѓе и нова енергија, -изјави Рогановиќ на прес конференцијата по поразот од Словенија.