Најмалку 45 лица загинаа, а 35 се повредени во пожар во црква во египетскиот град Гиза.

Пожарот, најверојатно во електричните инсталации, избувнал кога 5.000 верници се собрале на миса во црквата Абу Сифин во областа Имбаба, предизвикувајќи стампедо, велат очевидци.

Повредените се хоспитализирани, соопшти египетското Министерство за здравство.

Пожарот, според властите, сè уште не е изгаснат во црквата што го носи името на Свети Меркур Кесариски, на кого му се поклонуваат Коптите, најголемата христијанска заедница на Блискиот Исток со 10 до 15 од 103 милиони Египќани.

– Ги мобилизиравме сите државни служби за да бидат преземени сите мерки, објави претседателот Абдел Фатах ал Сиси на Фејсбук.

Во март 2021 година, најмалку 20 луѓе загинаа во пожар во текстилна фабрика во источното предградие на Каиро.

Во 2020 година, два пожари во болници ги однесоа животите на четиринаесет пациенти со Ковид-19.

Иако многубројни, Коптите сметаат дека се потиснати во општеството и ги осудуваат многу рестриктивните закони за изградба на цркви и многу полибералните закони за џамиите.

Темата е чувствителна, а коптскиот активист за човекови права Патрик Заки неодамна помина 22 месеци во притвор за „ширење лажни информации“ за напис во кој се разоткрива кршењето на христијанските права во Египет.

Коптите претрпеа исламистичка одмазда особено откако Сиси го собори исламистичкиот претседател Мохамед Морси во 2013 година со палење цркви, училишта и домови.

Сиси, првиот претседател на Египет кој секоја година присуствува на коптската божиќна миса, неодамна за прв пат во историјата назначи коптски судија да раководи со Уставниот суд.