Ирачкиот Парламент денеска го избра Абдел Латиф Рашид (78) за претседател на земјата, објави претставник на парламентот по пребројувањето на гласовите.

Од изборите во октомври 2021 година, земјата е во политичка криза бидејќи не беше можно да се постигне договор ниту за нов претседател ниту за премиер.

По вториот круг, Рашид е избран со повеќе од 160 гласови, додека претходниот претседател Бархам Салех собра 99.

Годинава парламентот веќе трипати неуспешно избираше претседател, што традиционално е почесна функција резервирана за курдското малцинство.

Поранешен министер и инженер, Рашид е компромисен кандидат за поларизирана земја.

Новиот претседател му го даде мандатот за формирање на новата влада на Мохамед Шија ал Судани, поранешен министер и претставник, припадник на шиитите.

Судани очекува формирање на владата „што е можно поскоро“.