Вакцината против корунавирусот на компаниите „Фајзер“/„БиоНТек“ почна да се тестира и врз деца на возраст од шест месеци до 11 години, изјави денеска портпаролот на „БиоНТек“ за ДПА.

Вакцината против Ковид-19, заеднички изработена од компанијата со седиште во Мајнц и американскиот фармацевтски гигант, досега доби условно одобрување за адолесценти на возраст од 16 и повеќе години.

Првите испитаници на возраст од 11 и помалку години вчера ги добија своите први дози од вакцината, како дел од првата фаза на студијата. Доколку безбедноста и ефикасноста се потврдат и властите дадат одобрение, вакцината може да им биде достапна на помладите деца на почетокот на 2022 година, соопштија двете компании, пренесе ДПА.

Во три одделни клинички испитувања вакцината веќе се тестира врз деца на возраст меѓу 12 и 15 години. Според извештаите, во оваа фаза од испитувањето учествуваат околу 2.259 деца од оваа возрасна група, а податоците ќе бидат објавени наскоро.