Финскиот претседател Саули Ниинисто и финската премиерка Сана Марин објавиле денеска дека нивната земја официјално ќе започне процедура за поднесување на барање за членство во НАТО на заедничка прес-конференција во Хелсинки.

„Ова е историски ден. Почнува нова ера“, рекол Ниинисто. Парламентот оваа одлука би требало да ја потврди во следните денови, но тоа е само формалност, јавува “AP”. После тоа ќе се предаде официјално барање во НАТО.

Зборувајќи заедно со претседателот во Хелсинки, финската премиерка Сана Марин рекла дека се надева дека парламентот ќе потврди одлуката за поднесување на барање за приклучување кон НАТО во следните неколку денови.

Таа изјавила дека двајцата биле во близок контакт со земјите членки на НАТО и дека Алијансата им се заблагодарува на досегашната поддршка.

„Во Финска пред нас е уште парламентарниот процес, но верувам дека парламентот одлучно и одговорно ќе расправа за оваа историска одлука“, рекла премиерката.

Процесот за ратификација инаку може да трае и една година, но Германија подготвила се за тој процес да мине брзо.

Германската министерката за надворешни работи Анален Бербок денеска изјавила дека се е подготвено за брз процес на ратификација ако Шведска и Финска одлучат да поднесат барање за членство во НАТО.

„Ако се одлучат да се приклучат, може брзо да се приклучат…Мора да се погрижиме да им дадеме безбедносни гаранции, не смее да има преоден период, сиви зони, во кои нивниот статус е нејасен“, рекла таа.