Пристапувањето на Украина во ЕУ ќе му даде право на Киев на околу 186 милијарди евра во текот на седум години, покажуваат интерните проценки на заедничкиот буџет на Унијата, претворајќи „многу“ постојни земји-членки во нето-плаќачи по првпат, пишува Фајненшл Тајмс.

.Официјалните претставници на ЕУ летово ги проценија потенцијалните финансиски импликации од проширувањето – студија во која имаше увид британскиот дневен весник, која користеше правила од тековниот буџет на Унијата за 2021-2027 година. Официјалните лица ги применија овие правила на буџетот на хипотетички проширена унија која ќе ги вклучи Украина, Молдавија, Грузија и шест земји од Западен Балкан.

Студијата, која е прва за Брисел во врска со потенцијалниот прием на девет нови земји-членки, ги истакнува сериозните политички и финансиски последици од проширувањето на унијата, забележува „Фајненшл тајмс“. Расчистувањето на патот за прием на Украина е главен приоритет за лидерите на ЕУ од почетокот на руската целосна инвазија на земјата, се вели во публикацијата.

Иако процесот на проширување веројатно ќе потрае повеќе од една деценија и ќе бара големи реформи во постојните буџетски одредби, очекуваниот обем на промени решително ќе го промени финансискиот биланс на блокот, коментира весникот.

„Сите земји-членки ќе мора да платат повеќе во буџетот на ЕУ и да добиваат помалку од него; многу земји-членки кои во моментов се нето-приматели ќе станат нето-плаќачи“, се заклучува во документот за ЕУ ​​подготвен од секретаријатот на Советот.

Според проценката на студијата, Украина би имала право да добие 61 милијарда евра од кохезионите фондови на ЕУ, кои имаат за цел да ја подобрат инфраструктурата во посиромашните земји-членки. Девет други земји-членки, вклучувајќи ги Чешката Република, Естонија, Литванија, Словенија, Кипар и Малта, ќе го изгубат правото на финансирање од тие фондови.

Сепак, студијата јасно наведува дека влијанието на Украина врз режимот на земјоделски субвенции во ЕУ ќе биде најзначајно, коментира Фајненшл тајмс. Украина ќе стане најголемиот примател на субвенции во блокот со своите 41,1 милиони хектари обработена земјоделска површина, преместувајќи ја Франција на второто место.