Стапката на инфлација во Германија продолжи да расте во мај со 7,9 отсто повисоки цени во споредба со истиот период минатата година, што е највисоко забележано зголемување на цените во Германија од нафтената криза во 1970-тите, соопшти денеска Федералниот завод за статистика во Визбаден.

Стапката од 7,9 отсто е повисока од проценките на водечките економисти кои очекуваа стапка на инфлација од 7,6 отсто за мај.

„Од почетокот на војната во Украина, особено цените на енергијата значително се зголемија, што се одрази на високата стапка на инфлација“, се вели во соопштението на Федералното биро за статистика.

Според последните статистички податоци, најмногу, за 38,3 отсто, поскапеле енергенсите, а прехранбените производи за 11,1 отсто.

Инфлацијата се должи и на прекини во синџирот на снабдување како резултат на нарушувања за време на корона кризатаи недостиг на персонал во логистичката индустрија.

Министерот за финансии Кристијан Линднер рече дека „инфлацијата треба да се потисне“ и најави враќање на строгите мерки за штедење и нула долг веќе од следната година.