Министерството за правда на САД обвини тројца севернокорејски хакери за кражба на криптовалута и традиционална валута од банки и други институции во износ од 1,3 милијарди долари.
Хакерите се воени разузнавачи од Северна Кореја.
Во соопштение, Министерството за правда на САД нагласува дека агентите користеле тастатури наместо оружје за да украдат криптовалута од дигиталните паричници и се наведени како водечки ограбувачи на банки во светот.
Тројцата агенти создале малициозни апликации за криптовалути, пробиле компјутери на жртви, пробиле компании и пазари за дигитални валути како што е биткоин и создале блокчејн платформа за да избегнат санкции и тајно да соберат пари, соопшти Министерството.
Случајот е поднесен во федералниот суд во Лос Анџелес и се надоврзува на обвиненијата поднесени во 2018 година против еден од тројца обвинети за хакерскиот напад на „Сони Пикчрс“ четири години порано, создавањето на вирусот „WannaCry“ и кражба на 81 милиони долари од Централната банка на Бангладеш во 2016 година
Новите обвиненија засегаат и уште двајца Севернокорејци.
