Шпанската влада најави дека ќе побара од Европскиот парламент да ја разгледа можноста за употреба на каталонскиот, кој, доколку предлогот помине, ќе стане првиот европски регионален јазик во официјална употреба во таа европска институција.

Мадрид ќе претстави технички и финансиски изводлив предлог до комисијата на ЕП во Брисел и ќе работи заедно на предложената промена. Централните шпански власти и регионалната влада во Каталонија се надеваат дека предлогот ќе биде усвоен до крајот на годинава.

Шпанија е подготвена, доколку тоа го сакаат другите две регионални влади во Баскија и Галиција, да побара од ЕП да ги вклучи баскискиот и галицискиот јазик, поврзани со португалскиот, на листата на официјални јазици.

„За еден јазик да стане официјален, потребно е исклучиво да биде побарано од земја членка на Европската унија и да добие зелено светло од Советот на Европската унија“, објасни портпаролот на Европскиот парламент.

Каталонскиот, заедно со шпанскиот, е широко користен во Каталонија и во два други соседни региони. Каталонскиот јазик бил потиснат за време на диктатурата на генералот Франциско Франко од 1939 до 1975 година.

Во моментов има 24 јазици на листата на официјални јазици во ЕП. Каталонските националистички партии долго време се залагаат за употреба на каталонскиот јазик во европските институции.

Главниот аргумент е дека овој шпански регион има повеќе жители, над седум милиони, од некои членки на Европската унија.

Каталонскиот, сепак, сè уште не е официјален јазик во националниот Сенат.