Израелските одбранбени сили (ИДФ) во неделата вечерта соопштија дека елитната поморска единица командоси Шајетет 13 уапсила висок член на терористичката група Хамас, додека борбите продолжуваат во јужен Израел повеќе од 40 часа откако Хамас ја нападна земјата.

ИДФ објави дека заменик-командантот на јужната дивизија на поморските сили на Хамас, Мухамед Абу Гали, бил заробен од Шајетет 13.

„Осомничениот е во притвор и во моментов е на распит“, се вели во соопштението на ИДФ.

Не се дадени повеќе детали за тоа како Абу Гали бил фатен. Според последните информации, Абу Гали е најстариот член на Хамас заробен од Израел за време на тековните борби.

Исто така, треба да се напомене дека поморските сили на Хамас се обиделе да извршат неколку напади за време на долготрајните борби, испраќајќи терористи преку морето за да се инфилтрираат во Израел. Израелската морнарица соопшти дека убила десетици терористи на Хамас додека се обидувале да извршат напади од морето. ИДФ објави во неделата навечер дека се уште се бори против палестинските терористи на израелска територија, 40 часа по почетокот на војната што ја започна терористичката група Хамас во саботата наутро.

Терористичката група Хамас со седиште во Газа започна напад без преседан врз Израел, истрелувајќи илјадници ракети и испраќајќи стотици вооружени лица во израелските заедници по копно, море и воздух, при што загинаа најмалку 700 луѓе, а беа повредени над 2.200. Терористите на Хамас зеле како заложници и најмалку 130 Израелци, меѓу кои и цивили и војници.

ИДФ соопшти дека војниците продолжиле да ги пребаруваат градовите во областа и дека сè уште разменуваат оган со терористите. Израелците беа евакуирани и од градовите во близина на границата со Газа. Во меѓувреме, ИДФ соопшти дека извршила масовни воздушни напади врз цели на Хамас во Појасот Газа.

Што е единица Шајетет 13?

Во последниве години, конфликтите на Блискиот Исток поставија бројни предизвици за израелските одбранбени сили и директно влијаеја на тековните операции, особено во специјализираните единици како Шајетет 13. Оваа единица е специјализирана за изведување упади од море на копно, собирање поморски разузнавачки информации и вршење саботажа, спасување заложници и контратерористички операции.

Израелските одбранбени сили, особено нивните специјални сили, значително се разликуваат од многу западни воени единици поради уникатните услови и опкружувањето во кое е основана Државата Израел и постојаната воена состојба со која се соочува од нејзиното основање. Од 1948 година, Израел доживеа бројни војни и турбулентни периоди поради британската колонијална политика во регионот. Оваа нестабилна средина го наведе Израел да развие една од најдобрите вооружени сили во светот. Воениот рок во ИДФ е задолжителен за сите израелски граѓани и трае 36 месеци за мажи и 18-21 месец за жени.

Шајетет 13 е единица на израелските одбранбени сили која е формирана во 1949 година, набргу по формирањето на Државата Израел. Нејзините оперативци, специјалисти за борба против тероризмот и спасување заложници, често се нарекуваат „тивки војници“. Низ годините, тие одиграа клучна улога во сите конфликти во Израел. Шајетет 13 е нашироко е позната како еден од најдобрите специјални сили во светот.

Откако ќе бидат избрани за Шајетет 13, војниците ја започнуваат програмата Масул, специјално дизајниран процес на обука што се смета за најригорозна физичка, професионална и ментална програма спроведена во израелските одбранбени сили. По завршувањето на програмата, регрутите ги добиваат официјалните ознаки на единицата (крилја на лилјаци со меч и штит) и им е дозволено да учествуваат во борбени активности. Периодот за обука трае 21 месец.