Во Нов Зеланд јуни годинава беше најтоплиот од почетокот на мерењето на температурата во земјата пред 110 години, покажуваат официјалните податоци за климата.

Според Националниот институт за истражување на водата и атмосферата, просечната температура во јуни беше за два степени Целзиусови повисока од вообичаената, а 24 локации низ целата земја забележаа рекордно максимални температури.

Просечната температура во јуни беше 10,6 степени Целзиусови, што е за два степени потопло од 30-годишниот просек за јуни и за 0,3 степени повисока од претходниот рекорд од 2003 и 2014 година. Поради тоа овој јуни во Нов Зеланд беше најтопол откако Институтот започна со мерење на температурите во 1909 година.

– Голем број фактори доведоа до новиот рекорд, вклучително и честите ветрови кои доаѓаат од потоплиот север, како и невообичаено високите температури на водата во океаните, изјави климатскиот експерт Грегор Макара.

Според него, просечната температура на Нов Зеланд е зголемена за околу еден степен во изминатите 100 години. Тој смета дека може да се очекуваат подоцнежни и поблаги зими доколку тој тренд продолжи.