Зад нас се две возбудливи недели на огромни промени и предизвици за Македонија. Од една страна политиката на неправење реформи дома и продавање магла надвор се соочи со реалноста дека не поминува во ЕУ, од друга политичка одговорност мора да има и затоа оваа влада на Заев паѓа и одиме на избори. Да бидам директен – основна причина зошто нема датум за почеток на преговори е ниското ниво на реформи, како и ставањето на Македонија во иста група со Албанија. За овие две работи имам посветено барем десетина колумни на страниците на „Независен весник“, во кои предупредував и апелирав да се земат сериозно тие предупредувања. Предупредував дека датум нема да има ни во јуни 2018, ни во јуни 2019, ни во октомври 2019 ако не се направат реформите кои значат подобар живот на граѓаните и ако Македонија не излезе од групата со Албанија. Заев и Димитров решија да го игнорираат тоа и денес сме каде што сме. Македонија апсолутно има европска иднина и може и треба да почне преговори со ЕУ. Тоа една нова и одговорна влада може да го реализира.

Во викендов зад нас практично се обзнани и падот на Зоран Заев. Тој е минато во Република Македонија и заврши неговата политичка кариера, останува запишан на најтемните страници на историјата. На Македонија ѝ треба и тие страници на историјата да се пишуваат за да паметат следните генерации како не треба. Заев, всушност, е пример како еден политичар на висока функција може да уништи нешто што е создавано со децении. Тој е пример, исто така, како една огромна меѓународна поддршка може да се прокоцка заради ситни лукративни интереси, заради криминал и корупција.

Оттука јасно е дека многу граѓани се разочарани и гневни и треба да се. Едноставно, не смеат да бидат жртви на неспособноста на оваа влада. Но суровата вистина е дека ЕУ ги оценува државите, пред сè според перформансот на владите. Владата на Заев има катастрофално неспособна дипломатија, затоа што со променето име, штетен договор со Бугарија и со сите национални концесии кои ги направија не може да добијат датум за преговори, а камоли да почнат со преговори за членство во Европската Унија.

Што правеше Зоран Заев во оваа година и пол? Што требаше да прават Заев и Никола Димитров? Не требаше да слезат од авион. Да одат од главен град до главен град, да се среќаваат буквално со секој кој ќе ги прими и кој ќе ги слуша и да ги молат да се раздвои Македонија од Албанија. Останувањето на Македонија во пакет со Албанија е штетно и по однос на македонскиот територијален интегритет и ја загрозува сигурноста на границите. Што мислите вие дали Франција толку ќе се противеше доколку во Македонија немаше афера во која се носат вреќи полни со пари, немаше афера „Рекет 2“ во која министерот за здравство и директорот на Фондот за здравство бараат пола од фирмата на приватен стопанственик, немавме многубројни скандали речиси во секој ресор, во секое министерство.
Тука легитимно се поставува прашањето и за политичките алтернативи и за понудата на ВМРО-ДПМНЕ. Во изминативе 22 месеци како раководство покажавме дека знаеме и можеме да се менуваме и кадровски и концепциски, покажавме и дека знаеме да сме одговорни кон државата. Тој дух мора да го пренесеме во институциите и во водењето на државата. ВМРО-ДПМНЕ може да понуди тим на способни и посветени луѓе и да се обиде барем наредната година да почнеме преговори за членство во ЕУ да не изгубиме уште една година.
Европската Унија сака да види една демократска држава, просперитетна во своите граници. Тоа може и мора да е Македонија. Нашиот план кој што го спремаме и ќе го понудиме во јавноста е во 2020 година да добиеме датум, да почнеме преговори и со една добра стратегија за 5 години да ги завршиме за да ја стигнеме 2025 година како една гранична година дадена за Србија и за Црна Гора. Таа е годината во која треба да е следното проширување на ЕУ кое мора да го достигнеме. Тоа со способна влада е возможно. Ние политичарите не треба да бидеме емотивни, за разлика од граѓаните кои се емотивни по прашањето за недобивање датум, туку рационално да погледнеме на нештата и да најдеме решенија да понудиме излез и многу работа која сум убеден ќе донесе резултати. СДСМ се занимава со нас, тврдејќи дека ни е мило и дека се радуваме за недобивањето датум, а не е така. Напротив, ќе бевме многу среќни да има датум за почеток на преговори и граѓаните да не се жртви на неспособноста на Зоран Заев, но за жал не е така. Како што споменав, на крај ЕУ ја оценува секоја држава најмногу според владата која ја води.
Сега треба да работиме и да се обединиме за обнова на Македонија, затоа што граѓаните заслужуваат прво да им го вратиме достоинството, потоа економски да ја обновиме и да живеат поубаво и просперитетно тука во Македонија.
Време за тагување нема, потребно е многу време за работа и резултати со јасна и зацврстена позиција дека интеграцијата во ЕУ нема алтернатива за Македонија! Секоја друга идеја или предлог за други сојузувања дали се регионални или се глобални е против интересите на Македонија и може да претставува дури и закана за територијалната целовитост на државата. Нашиот пат е јасен и мора да се остане на него. Многу работа и чесни луѓе со цел да почнеме преговори со ЕУ и да се обидеме до 2025 година да станеме и член на Унијата.

АЛЕКСАНДАР НИКОЛОСКИ

(Авторот е потпретседател на ВМРО-ДПМНЕ)