Од 6 часот утринава, па се до 30ти ноември Грција ќе биде во целосен карантин.
Граѓаните ќе можат да се движат само со претходно испратена СМС порака и тоа во случај на потреба од здравствени или прехранбени причини. Малопродажните продавници, угостителските објекти, театрите, ноќните клубови, средните училишта и универзитетите ставија клуч на вратите, додека пак, како што изјави грчкиот премиер Мицотакис, основните училишта и градинките ќе останат отворени во наредниот период.
Тој посочи дека потребни се драстични мерки поради агресивниот пораст на случаите во последните пет дена, во спротивно би довеле до неподнослив притисок врз здравствениот систем.
Раздвиженоста во трговските центри и паркови во Атина веднаш после најавата за 23 дневниот карантин потсетуваше на претпразнична атмосфера. Граѓаните, исто така, ги напуштаа поголемите градови упатувајќи се во своите викендици на море. Според информациите во грчките медиуми, во петокот изутрина за само три часа на излез од Атина поминале над 12 000 возила.
Покрај тоа, најавата за долгиот карантин предизвика протести и немири во повеќе градови во Грција.
Покрај Грција и останатите европски држави ја продолжуваат борбата со корона вирусот. Косовската влада воведе дополнителни мерки за заштита од ширењето на епидемијата на Ковид-19 вклучувајќи карантин, кој започна синоќа и ќе трае до понеделник во 5 часот наутро. Во Италија, пак, од синоќа на сила стапија нови, построги владини мерки на ограничувања, вклучително и полициски час на целата територија, што значи дека сè ќе се затвора до 22 часот, додека Тирана, како и главните градови на некои соседни земји ризикуваат делумен карантин.
