Централната изборна комисија на Бугарија на последната прес-конференција посочи кои 240 пратеници ќе заземат место во 45-от Парламент, по парламентарните избори одржани пред една недела.
Како што јави дописникот на МИА од Софија, вкупно 14 кандидати се откажале од мандат во новиот бугарски Парламент – девет од Движењето Права за слобода, тројца од ГЕРБ, вклучувајќи го и премиерот и лидер на партијата Бојко Борисов, како и двајца од „Има таков народ“.
Денешната одлука на ЦИК за избраните 240 пратеници во идниот Парламент ќе биде објавена во Државниот весник.
Комисијата навреме ја заврши обработката на податоците, а претседателот на ЦИК Александар Андреев коментираше дека изборите биле тешки, но успешно спроведени.
– Централната изборна комисија ќе го анализира изборниот процес, вклучително и проблемите, и ќе достави извештај до Националното собрание со предлози за измени во изборното законодавство, изјави Андреев.
Конечната распределба на местата во новиот бугарски Парламент меѓу шесте политички сили е следна: ГЕРБ – УДФ ќе ја претставуваат 75 пратеници, партијата на Слави Трифонов „Има таков народ“ – 51 пратеник, „БСП за Бугарија“ – 43, ДПС – 30 пратеници, „Демократска Бугарија“ – 27, „Стани! Излези!“ – 14 народни претставници.
Сега се очекува шефот на државата Румен Радев да ја свика конститутивната седница на новиот Парламент, што според весникот „Труд“, најверојатно ќе биде закажана за 15 април.
