Концертите на пијано дуо формациите не се реткост на фестивалот „Златна лира“, имајќи го предвид реномето и традицијата што ја ужива пијанистичката школа во нашата земја. Ваквиот пристап во селекцијата на програмата со посебен пиетет се обраќа на камерните остварувања на плејадата реномирани уметници-пијанисти кај нас кои со години, а и децении својот израз го градат и преку камерното музицирање. Ваквата традиција продолжува и на годинашното фестивалско издание чијашто програма вклучува дури три концерти на пијано дуо состави. Така, во петок, 22 октомври со почеток во 20 часот, во Музејот на македонската борба публиката ќе има можност да го слушне пијаното дуото Нина Костова и Ивона Базгалоска. На програмата се дела од романтичниот пијанистички репертоар, од композиторите Сергеј Рахмањинов, Едвард Григ и Петар Илич Чајковски.
Нина Костова музичкото образование го стекнува во Скопје, во класата на реномираните професори од Московскиот конзерваториум Петар Илич Чајковскиј Људмила и Борис Романов. Во текот на своето образование добитник е на бројни награди и признанија и често настапува на европските сцени: Велика Британија, Франција, Италија, Бугарија, Турција и сл. . Во периодот од 1991 до 2010 година, учесник е на сите семинари водени од проф. Борис Романов, организирани од ДМБУЦ – Скопје, МММ, како и Музичкото училиште „Добрин Петков“ во Пловдив, Бугарија и музичкото училиште „Војислав Вучковиќ“ од Белград, Србија. Настапила на сите завршни концерти од истите. Дипломира и магистрира со посебна пофалба cum laude, a во 2014 год. ги завршува докторските студии.
Повеќе пати настапува како солист со Македонска филхармонија, Младинскиот симфониски оркестар „Добрин Петков“ од Пловдив, Камерниот оркестар Св. Ѓорѓе, камерниот оркестар „Московија“, Симфонискиот оркестар на ФМУ. Соработувала со значајни диригенти од Македонија и од странство меѓу кои би ги издвоиле: Саша Николовски – Ѓумар, Александар Лековски, Боријан Цанев, Леонид Николаев, Едуард Грач, Пламен Парванов, Јанко Костелиц и други. Исто така одржува бројни настапи во камерни состави и дуа од кои би се издвоиле настапите во Сараево, Белгија, Италија, Франција и Њујорк како и настапот на Охридско лето со квартетот Хеншел од Германија. Моментално работи како вонреден професор на Факултетот за музичка уметност во Скопје. Со своите ученици и студенти постигнува огромни успеси, за кои показател се двете признанија од Карнеги Хол за посебен придонес на натпреварот „American Prodigy“ како и признанието од фондацијата „Спиваков“ за посебен придонес на фестивалот „Москва встречает друзја“ во 2013 год. Од 2018 год. Нина е почесен член на фондацијата Томислав Зографски.
Ивона Базгалоска по завршувањето на средното музичко училиште во ДМБУЦ „Илија Николовски – Луј“ во Скопје, во класата на проф. Нина Костова, каде работи и под менторство на професорите Романови, Ивона го продолжува своето образование на ФМУ во Скопје во класата на проф. Нина Костова Јаневска. Редовен учесник е на концерти, меѓународни и државни натпревари и семинари по пијано, а добитничка е на голем број награди и признанија, меѓу кои и седум специјални први награди. Music Prospect во Москва, Grand Piano in Palace во Санкт Петербург, Euterpe во Корато, Golden Classical Music во Њујорк, Grand Prize Virtouso во Лондон – се само дел од натпреварите на кои се стекнала со признанија. Редовно настапува солистички во државата, а меѓу позабележителните нејзини настапи се вбројува концертот во црквата „Св. Софија“ во Охрид во 2018 година, а токму на фестивалот „Златна лира“ е забележан настапот заедно со виолинистот Александар Иванов. Годинава, Ивона одржува и солистички рецитал во рамки на фестивалот „Concerti del Tempietto“ во Рим, Италија. Два пати (2015 и 2017 година) настапила како солист со оркестарот на Македонсакта филхармонија. Оваа година меѓу нејзините значајни настапи ќе остане забележан и настапот со оркестарот Санкт Петербург Камерата во Санкт Петербург, под диригентската палка на маестро Игор Манашеров.
