Директорот на Светската здравствена организација за Европа вели дека континентот наскоро би можел да влезе во долг мирен период од пандемијата со коронавирусот, пренесува Би-би-си.

Ханс Клуге ги наведе високите стапки на вакцинација, крајот на зимата и помалку тешката природа на омикронот како причина за оптимизам. Обраќајќи им се на новинарите, тој рече: „Овој период на поголема заштита треба да се гледа како „прекин на огнот“ што може да ни донесе траен мир“.

Најавата доаѓа откако голем број европски земји ги укинаа сите епидемиолошки мерки. Претходно оваа недела, Данска стана првата земја во Европската Унија која ги укина сите мерки, вклучително и носењето маски.

Иако случаите таму сè уште се релативно високи, властите велат дека вирусот повеќе не се квалификува како критична закана со високата стапка на вакцинација што помага населението да се заштити од сериозната болест. Норвешка исто така најави укинување на мерките, а Шведска во четвртокот објави дека исто така ќе ги укине речиси сите мерки на 9 февруари.

„Пандемијата не е завршена, но влегуваме во сосема нова фаза“, изјави шведската премиерка Магдалена Андерсон за новинарите.

Клуге денеска ги повика европските нации да продолжат со кампањите за вакцинација. Но, тој рече дека е уверен дека континентот ќе биде во подобра позиција дури и со повирулентниот сој на омикрон.

„Верувам дека е можно да се одговори на новите варијанти кои неизбежно ќе се појават без повторно инсталирање на мерките што ни беа потребни порано“, додаде Клуге.

Тој истакна дека околу 12 милиони нови случаи на коронавирус биле откриени низ Европа минатата недела.

Клуге повика на индивидуална одговорност, понатамошна заштита на ризичните групи и како што рече, на драстично и бескомпромисно зголемување на споделувањето вакцини преку границите за да се помогне во заштитата низ целиот свет.