Македонскиот кошаркарски тренер, Емил Рајковиќ, влезе во историјата на регионалната ВТБ-лига како втор стратег на кого му успеало регуларниот дел од сезоната да го заврши без пораз, откако неговата ЦСКА Москва убедливо го совлада Зенит (100-80).
Претходно, тоа го направи само Римас Куртинаитис во сезоната 2013/14, но со помалку средби бидејќи се играло во две групи, поради што на крајот имал скор 18-0. Нашиот Рајковиќ, пак, завршува со скор 22-0 со што ќе биде запаметен како најдобар во една од најсилните лиги во Европа.
Македонецот веќе го собори рекордот по бројот на победи по ред во ВТБ, а ќе се обиде да го направи невозможното – да дојде до титулата без ниту еден пораз.
ЦСКА Москва како неприкосновен лидер влегува во втората фаза, во која екипите се делат во две групи. Во групата А се првите шест екипи и тоа ЦСКА, Уникс, Зенит, МБА, Нижни Новгород и Локомотив Кубан, додека во групата Б ќе се сретнат Парма, Самара, Автодор, Енисеј, Астана и Минск.
Ќе се играат уште десет кола во периодот од 28 јануари до 26 март, по што на екипите од групата А во четвртфиналето од плејофот ќе им се придружат двете првопласирани екипи од групата Б во битката за титулата.
