Една од најуспешните, ако не и најуспешната жена-тренер во кошарката, Марина Маљковиќ, дојде до нов голем трофеј во кариерата и ја освои Евролигата со турскиот кошаркарски клуб Фенербахче.

Во мечот за титула Фенер беше убедлив против ЦБК Мерсин исто така од Турција со (99-60). Американката Стјуарт за победникот даде 35 поени, пред Мекбрајд исто така од САД со 16 поени, а кај Мерсин, Атас, Корнелиус, Црвендакиќ и Вилијамс дадоа по десет поени.

За Маљковиќ ова беше прва титула во кошаркарската Евролига, откако претходно со тимот на Галатасарај. го освои Еврокупот. Таа дојде рамо до рамо со српскиот кошаркарски стратег Жељко Обрадовиќ кој со Фенербахче претходно го имаше истото достигнување.

Марина Маљковиќ исто така влезе во друштво на нејзиниот татко Божидар Маљковиќ кој е четирикратен шампион во Евролигата со Југопластика и Лимож. Воедно, овој податок е и историски затоа што досега нема татко и ќерка кои како тренери имаат титули во елитата.