Европската фубдалска асоцијација (УЕФА) ги објави кандидатите кои покажале сериозен интерес и доставиле официјално барање за да бидат домаќини на финалните натпревари во евро-куповите во 2026 и 2027 година.

Вкупно девет фудбалски федерации ја испратиле потребната документација до УЕФА, но оваа бројка може да се зголеми, затоа што крајниот рок за пријавување е 21 февруари следната година.

До овој момент пристигнале само две кандидатури за одржување на финалињата во Лигата на шампионите, едната е од стадионот „Сан Сиро“ во Милано, а другата од „Пушкаш Арената“ во Будимпешта. За финалниот натпревар во женската Лига на шампиони конкурираат Гелзенкирхен и Штутгарт од Германија, „Улевал“ стадионот во Осло, Норвешка, како и легендарниот „Хампден Парк“ во Глазгов, Шкотска.

Финалните мечеви во Лига Европа би можеле да се одиграат во Германија (исто така конкурираат четири стадиони), потоа следува „Арена Национала“ во Букурешт, а на оваа листа уште се „Хампден Парк“ од Глазгов и еден од трите најголеми стадиони во Истанбул, стадионот на Бешикташ.

Најголем интерес има за домаќинство на финалните натпревари од Конференциската лига, а тука во игра се дури шест стадиони: „Лајпциг Арена“ од Германија, стадионот „Теди“ во Тел Авив, „Улевал“ од Осло, „Хампден Парк“ од Глазгов, стадионот во Женева, Швајцарија, како и домот на Бешикташ во Истанбул, Турција.

Се забележува дека „Хампден Парк“ се појавува најчесто на листата на кандидати, а тоа значи дека Шкотите веројатно сакаат после подолго време, во нивната земја да се одржи еден натпревар со големо значење, што секако би било празник за публиката.