Ненадејниот напад на палестинската организација Хамас врз Израел, извршен од вооружени луѓе кои ги пробиваа безбедносните бариери и низа проектили истрелани од Појасот Газа, почна денеска утрото за време на големиот еврејски празник Симхат Тора.

Нападот се случи 50 години и еден ден откако египетските и сириските сили започнаа офанзива против Израел за време на еврејскиот празник Јом Кипур во обид да ја вратат контролата врз територијата заземена од Тел Авив во кратката војна во 1967 година.

Палестинската исламистичка група Хамас испука низа проектили врз јужен Израел околу 6:30 часот, а сирените се слушаа во Тел Авив и Беер Шева. Хамас соопшти дека првично испукал 5.000 ракети. Израелската армија тврди дека биле истрелани 2.500 проектили.

Израелската армија вели дека околу 7:40 часот палестински борци навлегле во Израел.

Повеќето од борците влегоа низ дупките во безбедносните бариери што ја делат Газа од Израел. Еден војник е снимен како ја преминува границата со моторизиран параглајдер, а глисер е снимен и како се движи кон Зиким, израелски крајбрежен град и воена база.

Хамас објави видео снимки од вооружени лица кои ги пробиваат безбедносните огради

На фотографијата што ја објави Хамас се гледа како булдожер крши дел од безбедносната ограда. Израелската армија соопшти дека палестинските борци во 10 часот упаднале во најмалку три воени објекти околу границата, граничниот премин Ерез, базата Зиким и седиштето на дивизијата Газа во Реим. Армијата додаде дека борбите во Ерез и Зиким се уште траат.

На видеата на Хамас се гледа како борци кои очигледно преземаат дел од израелски воен објект и пукаат. Неколку заробени израелски воени возила подоцна беа снимени на пат кон Газа, каде потоа беа јавно изложени.

Борците го нападнаа израелскиот пограничен град Сдерот, а нивното присуство е забележано и во друга погранична област Беери и во градот Офаким, 30 километри источно од Газа, јавуваат израелските медиуми, кои се повикуваат на телефонски разговори со жителите на тие области како извори.

Началникот на израелската полиција Јаков Шабтаи утрото изјави дека безбедносните сили се борат со вооружени лица на 21 локација, а во 13:30 часот војската соопшти дека војниците се уште се обидуваат да ги исчистат областите окупирани од Палестинците.

Израелските медиуми јавија за најмалку сто загинати Израелци и 900 ранети. Видеата на Хамас и непотврдените фотографии на социјалните мрежи покажуваат мртви цивили, израелски војници и палестински борци. Израелското Министерство за надворешни работи соопшти дека вооружените членови на Хамас оделе од куќа до куќа, убивајќи цивили во тој процес.

Израелските медиуми објавија дека напаѓачите зеле заложници во Офаким. Организацијата „Исламски џихад“ соопшти дека држи неколку заробени израелски војници, а на социјалните мрежи на Хамас сподели снимка од она што изгледа како затвореници кои се живи однесени во Газа.

Израелците одговорија со контранапад. Експлозии се слушнале во 9:45 часот во центарот на Газа и градот Газа, а во 10 часот портпаролот на израелската војска изјавил дека воздухопловните сили погодуваат цели во Газа. Здравствените власти во Појасот Газа соопштија дека најмалку 198 лица загинале, а 1.610 се повредени во израелските воздушни напади врз Појасот Газа.