Лицата кои имаат крвна група нулта негатив (0-) имаат 12 отсто помали шанси да се заразат со коронавирус во однос на сите останати крвни групи, покажало новото истражување кое ги следело изложеностите на различни крвни групи на коронавирусот.

Истото истражување покажува и дека е помала шансата дека негативните крвни групи (O-, A-, B- или AB-) ќе се заразат со вирусот во однос на позитивните – во просек, дури 21 отсто е помала шансата дека негативните крвни групи ќе се заразат.
Покрај тоа, луѓето со нулта негативна крвна група имаат и 13 отсто помали шанси да развијат тешки симптоми и 19 отсто е помала веројатноста да умрат од последици од вирусот.

Ова истражување го направил Институтот за клинички истражувања во Торонто, а истражувањето е спроведено врз 225.556 лица кои биле позитивни на коронавирус.

„Меѓу 1.328 пациенти инфицирани со ковид, најголемата веројатност за смрт има кај носители на крвните групи AB и B стои во заклучокот на ова истражување објавено во магазинот „Annals of Internal Medicine“.

Овие податоци се совпаѓаат со веќе спроведената студија во Кина, направена на пациенти во провинцијата Хубеи, каде научниците дошле до истиот заклучок.

Претходните студии од експерти од Универзитетот во Кил и Универзитетската клиника во Осло покажале дека луѓето со крвна група А имаат поголем ризик од потежок облик на болеста.

Двојно е поголема веројатноста дека заразено лице со крвна група А ќе заврши на респиратор во однос на заразените со нулта (0) крвна група. Крвните групи B и AB се некаде помеѓу, заклучиле тогаш научниците.